ᲑᲐᲗᲣᲛᲘᲡ "ᲓᲘᲜᲐᲛᲝ" “ᲐᲛᲙᲐᲠᲗᲐᲜ” ᲯᲘᲥᲘᲐᲡ ᲒᲝᲚᲘᲗ ᲓᲐᲛᲐᲠᲪᲮᲓᲐ

საქართველოს ვიცე-ჩემპიონმა ბათუმის "დინამომ", რომელიც ევროპის ლიგის პირველ საკვალიფიკაციო ეტაპზე ნიქოზიის "ომონიასთან" გასამართი მატჩისთვის თურქეთში ემზადება, მორიგი ამხანაგური მატჩი ჩაატარა.

კარტეპეში ზღვისპირელებმა მესამე სპარინგი გამართეს და ამჯერად წინა ორისგან განსხვავებით დამარცხდნენ "დინამოს" მეტოქე ამჯერად რუსეთის პრემიერლიგის ბინადარი პერმის "ამკარი" გახლდათ. შეხვედრის ბედი კი 81-ე წუთზე გადაწყდა, როცა რუსების გათამაშებული კუთხური ქართული წარმომავლობის, მაგრამ რუსეთის მოქალაქეობის მქონე მცველმა გიორგი ჯიქიამ დააგვირგვინა. ჯიქია "ამკარში" სინჯებზე იმყოფება, მანამდე კი ძერჟინსკის “ხიმიკში" თამაშობდა.

ბათუმის "დინამო" კარტეპეში კიდევ ერთ ამხანაგურ მატჩს ჩაატარებს, რის შემდგომაც სამშობლოში დაბრუნდება და 2 ივლისს, ზესტაფონში, "დავით აბაშიძის" სტადიონზე "ომონიას" უმასპინძლებს.